تاند (پنجشنبه د زمري ـ اسد ۱۵مه) د جرمني د بایرن ایالت د مونیخ عالي محکمې یو ۲۵ کلن افغان کډوال په عمري بند محکوم کړ.
رسنیو په خپلو راپورونو کې دغه کډوال فرهاد یاد کړی دی.
راپورونه وایي چې، فرهاد د دوو کسانو د وژنې، د ۲۳ نورو د وژلو د هڅې او ۲۲ نورو کسانو ته د خطرناکو بدني ټپونو اړولو په جرم پر عمري بند محکوم کړی دی.
د محکمې د پرېکړې له مخې، هغه د ۲۰۲۵ کال په فبرورۍ کې په مونیخ ښار کې خپل موټر د یوې اعتراضي غونډې پر ګډونوالو ور خیژولی و چې، په پایله کې یوه ۳۷ کلنه ښځه او د هغې دوه کلن ماشوم ووژل شول او له ۴۰ زیات کسان ټپیان شول.
محکمې ویلي، د جرم د ځانګړي جدیت له امله به د هغه لپاره ۱۵ کلونو وروسته د مشروطې آزادۍ ترلاسه کول هم ډېر ستونزمن وي.
کارپوهان وایي، دا ډول پېښې د افغان کډوالو پر ټولنیز حیثیت، د هغوی د منلو پر بهیر او د کډوالۍ پر سیاسي بحثونو منفي اغېز کولی شي.
د دوی په وینا دا ډول پېښې په ځانګړي ډول، ښايي د افغان کډوالو پر وړاندې د عامه افکارو حساسیت او د امنیتي اقداماتو غوښتنې زیاتې کړي.