تاند (پنجشنبه، د زمري/ اسد ۱۵ مه) د کډوالۍ نړیوال سازمان (IOM) خبرداری ورکړی چې په افغانستان کې د اقلیمي بدلون له امله رامنځته کېدونکو طبیعي پېښو د بشري مرستو اړتیاوې بېسارې کچې ته رسولې دي.
یاد سازمان وایي، په داسې حال کې چې د مرستو اړتیاوې په چټکۍ سره زیاتې شوې، د زیانمنو کسانو د ملاتړ لپاره د مرستندویو بنسټونو سرچینې او وړتیاوې له جدي ننګونو او سختو محدودیتونو سره مخامخ دي.
د سازمان په وینا، د اقلیمي بدلونونو له امله د طبیعي پېښو د تکرار او د شدت له زیاتېدو سره، د هغو کسانو شمېر هم د پام وړ زیات شوی چې بېړنیو بشري مرستو ته اړتیا لري، خو مرستندویې ادارې کافي امکانات او مالي سرچینې نه لري.
د کډوالۍ نړیوال سازمان په خپل بیان کې، چې په اېکسپاڼه (X) کې یې خپره کړې، ویلي چې د نړیوالو تمویلوونکو په مالي ملاتړ او د خپلو شریکانو په همغږۍ، زیانګالو ټولنو ته د مرستو رسولو هڅې دوام لري.
د دې بنسټ په وینا، د مرستو په ورکولو کې هغو کسانو ته لومړیتوب ورکوي چې د اقلیمي بحرانونو له امله یې تر ټولو ډېر زیان لیدلی دی.