تاند (پنجشنبه د زمري ـ اسد ۱۵مه) بنګلهدېشي پولیسو ویلي، چې د دغه هېواد د کرکټ ملي لوبډلې د پخواني کپتان شکیب الحسن پر کور یوې ډلې برید کړی دی.
دا پېښه د چهارشنبې په ورځ، وروسته له هغې رامنځته شوه، چې شکیب الحسن د بنګلهدېش، د له واکه لرې شوې پخوانۍ لومړۍ وزیرې، شیخ حسینې په غونډه کې ګډون وکړ.
د پولیسو په وینا، برید کوونکو په ماګورا ښار کې د شکیب الحسن پر پلرني کور برید کړی.
دغه ښار د بنګلهدېش له پلازمېنې ډاکا شاوخوا ۱۷۰ کیلومتره سوېللوېدیځ ته موقعیت لري.
برید کوونکو د ودانۍ ښیښې ماتې کړي او دننه یې اور اچوونکي بمونه غورځولي، چې له امله یې د ودانۍ د پورتنۍ برخې یوه برخه سوزېدلې ده.
نړیوالو رسنیو، په ځانګړي ډول رویټرز، هم د دغه برید پخلی کړی او راپور یې ورکړی چې ودانۍ ته مالي زیانونه اوښتي دي.
پولیسو ټینګار کړی چې د برید پر مهال په کور کې هېڅوک نه وو موجود؛ له همدې امله په دې پېښه کې د مرګژوبلې یا ټپي کېدو راپور نه دی ورکړل شوی.