تاند (جمعه، د زمري/ اسد ۸ مه) د بلوچستان ایالن د طبیعي پېښو پر وړاندې د مبارزې ادارې (PDMA) ویلي، د کوټې ښار ته نژدې د سکرو په یوه کان کې د
ګازو د چاودنې له کبله لږ تر لږه ۱۸ تنه مړه شوي دي.
پاکستاني رسنیو تېره شپه ناوخته د بلوچستان ایالن د طبیعي پېښو پر وړاندې د مبارزې ادارې د مسوولانو په قول وویل، له چاودنې وروسته د ۷ کانکیندونکو مړي هم له کان څخه ایستل شوي او د پاتې کسانو د موندلو هڅې لا هم روانې دي.
د ادارې په وینا، د سورینج سیمې د سکرو په کان کې د میتان ګاز د چاودنې له امله ۴۲ کانکیندونکي بند پاتې شوي وو.
د کان مالک ویلي، د چاودنې پر مهال په کان کې ۴۲ کارګران موجود وو او پېښه د میتان ګاز د چاودنې له امله شوې ده.
د بلوچستان اعلی وزیر د پېښې راپور غوښتی او ویلي یې دي، که د چا د غفلت یا بېاحتیاطۍ ثبوت وموندل شي، د مسوولو کسانو پر ضد به قانوني اقدام وشي.