تاند (دوشنبه د اسد/زمري ۶مه) د ملګرو ملتونو د بشري مېشت ځایونو پروګرام (UN-Habitat) ویلي چې په افغانستان کې لا هم میلیونونه خلک د پاکو او خوندي څښاک اوبو ته لاسرسی نه لري.
دغه بنسټ نن (سهشنبه، د اسد ۶مه/د جولای ۲۸مه) په خپلې اېکسپاڼه لیکلي چې اوبه د ژوند بنسټ دی، خو د افغانستان اوسېدونکي لا هم د څښاک پاکو اوبو د ترلاسه کولو لپاره له ګڼو ستونزو سره مخ دي.
د یاد بنسټ په وینا، هوښیار ښاري پلان جوړونه او د اوبو اغېزناک مدیریت کولی شي د اوبو د سرچینو په ساتنه، د عامې روغتیا د وضعیت په ښه کولو او د سالمو ټولنو په رامنځته کولو کې مهم رول ولوبوي.
دغه بنسټ د افغانستان د اوبو د سرچینو د ساتنې لپاره د ګډو او همغږو اقداماتو غوښتنه کړې ده.
افغانستان د هغو هېوادونو له ډلې دی چې د اقلیمي بدلونونو او د اوبو د کمښت له سختو اغېزو سره مخ دی.
افغانستان په وروستیو کلونو کې پرلهپسې وچکالۍ، د بارانونو کموالی او د اوبو د سرچینو د کمېدو له ستونزو سره لاس او ګرېوان دی.
تر دې وړاندې هم ملګرو ملتونو خبرداری ورکړی و چې د افغانستان له نیمایي څخه ډېره برخه وګړي د اوبو له سخت کمښت او وچکالۍ څخه اغېزمن شوي دي.
د څښاک پاکو اوبو نشتوالی یوازې د چاپېریال ستونزه نه ده، بلکې د عامې روغتیا، کرنې، اقتصاد او ټولنیز ثبات لپاره هم جدي ګواښ ګڼل کېږي.
که د اوبو د مدیریت، زېرمه کولو او ساتنې لپاره اغېزناک او اوږدمهاله اقدامات ونه شي، نو د هېواد په بېلابېلو سیمو کې به د اوبو کمښت لا پسې پراخ او د خلکو د ژوند پر کیفیت به منفي اغېز وکړي.
کارپوهان وایي، د اوبو د بحران د حل لپاره د حکومت، نړیوالو بنسټونو او خلکو ګډې هڅې اړینې دي.
دوی زیاتوي چې، د اوبو د سرچینو ساتنه، د بندونو او زېرمو جوړول، د باراني اوبو راټولول او د اوبو له بېځایه مصرف څخه مخنیوی هغه لارې دي چې کولی شي د افغانستان د راتلونکو کلونو د اوبو د بحران شدت راکم کړي