تاند (دوشنبه د چنګاښ/سرطان ۲۹مه) د افغانستان کرکټ بورډ له لوري د ۱۹ کلنو ملي لوبډلې لپاره د لوبغاړو د غوراوي لړۍ دویمه برخه په ننګرهار کې پیل شوې ده.
د غوراوي لومړۍ برخه په خوست کې ترسره شوه.
دوهم پړاو ته د لوبغاړو د غوراوي بهیر له سیالیو چې ۶۴ لوبغاړو برخه اخیستې وه، یوازې ۳۳ یې د ننګرهار کمپ ته ټاکل شوي دي.
کرکټ بورډ وایي، له دغو لوبغاړو سره د بېلابېلو روزونکو له لوري د مهارت لوړونې او فزیکي تکړښت په برخه کې کار کېږي چې پکې دوه تمریناتي سیالۍ او د غوراوي بهیر پنځه سیالۍ هم شاملې دي.
سرچینه زیاتوي چې، د کمپ د مهارت لوړونې او فزیکي تکړښت برخه د ننګرهار په نجیب الله تره کي کرکټ لوبغالي او د سیالیو برخه یې د ننګرهار په غازي امان الله خان کرکټ لوبغالي کې ترسره کیږي.
دغه کمپ د جولای میاشتې له لومړۍ نېټې پیل او د اګست میاشتې تر پنځمې نېټې پورې به دوام ومومي.
د کرکټ بورډ خبرپاڼه کې راغلي چې، د غوراوي پروسې د ټولو پړاوونو له بشپړېدو وروسته به د غوراوي کمېټې غړو او روزنیزې ډلګۍ له لوري د ۱۹ کلنې ملي لوبډلې لپاره لوبغاړي غوره شي.