تاند، سه شنبه، د جوزا ۶مه: د امنیت شورا وايي، افغان حکومت تمه لري چې تاوتریخوالی کم شي او اختریز اوربند دوام وکړي.
د ملي امنیت شورا ویاند جاوېد فیصل نن په یو خبري کنفرانس کې وویل، طالبان باید تاوتریخوالی ختم کړي او اوربند ته ژمن پاتې شي.
د فیصل په خبره د جګړې اصلي قربانیان خلک دي او د اوربند دوام کولی شي چې د طالب بندیانو د ازادۍ لړۍ چټکه کړي: (( اوربند، د بندیانو خوشې کول او د مذاکراتو پيل یو په بل پورې تړلي دي، او داوربند دوام خورا اړین دی.))
نوموړي وویل، نن به حکومت ۹۰۰ طالبان ازاد کړي خو د پاتې زندانیانو خوشې کېدل او نه خوشې کېدل په طالبانو پورې اړه لري چې دوی څومره مسوولیت ادا کوي: (( یوازې د حکومت هڅې ګټه نه کوي او طالبان هم باید متقابل اقدامات وکړي.))
دا په داسې حال کې ده چې دمعلوماتو له مخې نن د څرخي پله له زندانه ۳۵۰ طالبان خوشې کېږي او پاتې شاوخوا ۵۵۰ بندیان به له بګرام او نورو زندانونو خوشې کړای شي.
تر اوسه افغان حکومت د طالبانو ۱۱۰۰ بندیان ازاد کړي دي او د ۲ زره نورو بندیانو د خوشې کولو لړۍ ته چمتووالی روان دی.
په مقابل کې يې طالبانوتر اوسه ۲۷۶ افغان زندانیان خوشې کړي دي چې یوه برخه یې ملکیان او یوه برخه یې نظامیان دي.