تاند (یکشنبه، د غبرګولي/ جوزا ۳۱ مه) ایراني دولتي رسنیو ادعا کړې چې د امریکا د ولسمشر ډونالډ ټرمپ د وروستیو څرګندونو له امله د ایران او امریکا ترمنځ د سویس مذاکرات له خنډ سره مخامخ شوي دي.
د راپورونو له مخې، ټرمپ د خبرو اترو له پیل سره هممهاله خبرداری ورکړی چې که ایران ونه توانېږي په لبنان کې د حزب الله د تاوتریخوالي مخنیوی وکړي، امریکا به پر ایران بریدونه بېرته پیل کړي.
د ایران د مرکچي پلاوي مشر محمدباقر قالیباف هم په ایکسپاڼه کې لیکلي چې د ایران وسلهوال ځواکونه د امریکا د ګواښونو پر وړاندې د بل ډول ځواب ورکولو لپاره چمتو دي.
د هرمز تنګي په اړه د ټرمپ خبرداری
ټرمپ له فاکس نیوز سره په مرکه کې ویلي، که له ایران سره کومه هوکړه ونه شي، امریکا ښايي د هرمز تنګي کنټرول په لاس کې واخلي.
هغه زیاته کړه: «که اړتیا وي، تنګی به تر خپل کنټرول لاندې راولو. که هوکړه ونه شي، له دې لارې به محصول اخلو.»
دا څرګندونې وروسته له هغې کېږي چې د ایران د سپاه پاسداران خاتمالانبیا قوماندانۍ اعلان وکړ چې د لبنان د اوربند د سرغړونې په غبرګون کې به د هرمز تنګی بند کړي.
د مذاکراتو لومړی پړاو
ایراني رسنیو او رویټرز راپور ورکړی چې د ایران او امریکا ترمنځ د یکشنبې ورځې د مذاکراتو لومړی پړاو د سویس په لوسرن ښار کې پای ته رسېدلی دی.
دغه څلور اړخیزه ناسته د ایران، امریکا، پاکستان او قطر د استازو په ګډون ترسره شوه. د امریکا پلاوي مشري د ولسمشر مرستیال جې ډي ونس او د ایراني پلاوي مشري محمدباقر قالیباف کوله.
فارس خبري اژانس د یوې خبرې سرچینې له قوله ویلي چې لومړی پړاو له شاوخوا ۸۰ دقیقو خبرو وروسته د داخلي سلا مشورو لپاره ودرول شو.
د راپورونو له مخې، په دغو خبرو کې د لبنان جګړه، د هرمز تنګي وضعیت او د ایران د یورانیمو زېرمې د بحث مهم موضوعات وو.
جي ډي ونس د مذاکراتو له پیل مخکې ویلي و چې دا یوه تاریخي ناسته ده او امریکا له ایران سره د اړیکو د اساسي بدلون لپاره چمتووالی لري.