تاند (چهارشنبه، د غبرګولي/ جوزا ۱۹ مه) پر افغانستان د واکمن رژیم چارواکو د سېشنبې په ورځ (د جون ۹مه) اعلان وکړ چې د ترکمنستان–افغانستان–پاکستان–هند (تاپي) د طبیعي ګاز نللیکې د افغانستان برخې د جوړولو چارې په هرات ولایت کې تر نیمایي زیاتې بشپړې شوې دي.
د کانونو او پټرولیم وزارت ویاند همایون افغان ویلي چې د هرات په برخه کې د پروژې شاوخوا ۵۲ سلنه کارونه بشپړ شوي دي.
دا څو میلیارد ډالري پروژه د دې لپاره طرحه شوې چې د منځنۍ او جنوبي اسیا ترمنځ د انرژۍ لېږد اسانه کړي، سیمهییزې همکارۍ پیاوړې کړي او افغانستان ته د ترانزیت له لارې عواید زیات کړي.
د وزارت د معلوماتو له مخې، تر اوسه ۸۰ کیلومتره نللیکه غځول شوې ده. په دې کې ۳۶.۳ کیلومتره نلونه تر ځمکې لاندې نصب شوي او د نورو ۵۱ کیلومترو د ښخولو چمتووالی روان دی.
همداراز، د پروژې د پلي کېدو لپاره ۱۲۶ کیلومتره ځمکه چمتو شوې او ۱۰۸ کیلومتره خدماتي سړکونه جوړ شوي دي.
چارواکي وایي چې له ترکمنستان څخه د پروژې ساحې ته د نللیکې نور ۷۲.۳ کیلومتره پایپونه هم لېږدول شوي دي.
د راپور له مخې، ترکمنستاني چارواکو خپلو افغان سیالانو ته ډاډ ورکړی چې د هرات ولایت دننه د نللیکې ټول ۱۳۰ کیلومتره برخه به د ۲۰۲۶ کال تر پایه بشپړه شي.
ټاکل شوې چې د هرات د برخې له بشپړېدو وروسته د افغانستان په نورو ولایتونو کې هم د تاپي پروژې د جوړولو چارې پیل شي.
تاپي پروژه له اوږدې مودې راهیسې د سیمې د یوې مهمې اقتصادي پروژې په توګه یادېږي، چې موخه یې د پاکستان او هند بازارونو سره د افغانستان له لارې د ترکمنستان د ګازو د زېرمو نښلول دي.
د افغانستان لپاره دا پروژه د ترانزیتي عوایدو د ترلاسه کولو او د بنسټیزو زیربناوو د پراختیا مهم فرصت بلل کېږي، خو د سیاسي بېثباتۍ او امنیتي ستونزو له امله یې پلي کېدل څو ځله ځنډېدلي دي.
په همدې حال کې، د روان کال په جنورۍ کې د هرات سیمهییزو چارواکو ویلي وو چې د تاپي پروژې په ۹۱ کیلومتره مسیر کې د پاککارۍ چارې بشپړې شوې او دغه مسیر د پایپونو د نصب لپاره چمتو شوی دی.