تاند (دوشنبه، د غويي/ ثور ۷مه) د روغتیا نړیوال سازمان (WHO) د واکسین د نړیوالې اوونۍ په لړ کې د افغانستان له خلکو غوښتي چې خپل ماشومان واکسین کړي، ځکه چې د واکسین د پوښښ ټیټه کچه د جدي روغتیايي خطرونو سبب شوې ده.
دغه سازمان ویلي چې په افغانستان کې ډېر ماشومان له هغو ضروري او منظمو واکسینونو څخه بېبرخې پاتې شوي چې کولی شي د هغوی ژوند وژغوري.
د روغتیا نړیوال سازمان په خپل پیغام کې ویلي چې کورنۍ دې نژدې روغتیايي مرکزونو ته مراجعه وکړي، څو ډاډ ترلاسه شي چې ماشومان د مخنیوي وړ ناروغیو پر وړاندې په بشپړ ډول خوندي شوي دي.
دا اداره زیاتوي چې د واکسین د پوښښ تشې لا هم یوه جدي اندېښنه ده او زرګونه ماشومان د هغو ناروغیو له خطر سره مخامخ دي چې که پر وخت واکسین شي نو مخنیوی یې ممکن دی.
د واکسین نړیواله اوونۍ هر کال د اپرېل په وروستۍ اوونۍ کې لمانځل کېږي، او هدف یې د بېلابېلو عمرونو ترمنځ د واکسین کارونې ته وده ورکول او د ناروغیو د مخنیوي په اړه د خلکو پوهاوی زیاتول دي.
افغانستان لا هم جدي روغتیايي ستونزې لري، لکه د روغتیايي خدماتو محدود لاسرسی، کمزوری بنسټیز جوړښت، او د بودیجې کمښت چې د منظم واکسین پروګرامونه یې، په ځانګړي ډول په کلیوالو سیمو کې، اغېزمن کړي دي.
روغتیايي ادارې خبرداری ورکوي چې د جګړو، بېځایه کېدو او اقتصادي ستونزو له امله رامنځته شوي ګډوډیو د واکسین کچه راکمه کړې او د ماشومانو ترمنځ د ناروغیو د خپرېدو خطر یې زیات کړی دی.
افغانستان او پاکستان لا هم یوازیني دوه هېوادونه دي چې د ګوزڼ (پولیو) ویروس پکې په بشپړ ډول له منځه نه دی وړل شوی، نو ځکه د واکسین هڅې په دواړو هېوادونو کې ځانګړی اهمیت لري.
د دواړو هېوادونو ترمنځ د خلکو تګ راتګ او د واکسین د پوښښ تشې د پولیو د له منځه وړلو هڅې لا هم له ننګونو سره مخامخ کوي، چې د دې لپاره دوامداره سیمهییزه همکاري او د عامې روغتیا پانګونه اړینه بلل کېږي.