تاند (پنج شنبه د غوئي – ثور ۳مه) په پاکستان کې د ایران او امریکا ترمنځ د سولې د خبرو اترو تر دوهم پړاو پیل وړاندې د امریکا دفاع وزارت د سمندري ځواک د وزیر جان سي فیلان استعفا اعلان کړې ده.
د پنټاګون ویاند شان پارنیل په یوه برېښنالیک کې لیکلي چې فیلان به “سملاسي له پنټاګون کې دنده پرېږدي”.
د نوموړي د استعفا احتمالي دلیل په هکله څه نه دي ویل شوي.فیلان د ۱۳ میاشتو لپاره په دې مقام کې دنده ترسره کړه.
د امریکا د سمندري ځواک لپاره ټاکل شوې د یاد وزارت مرستیال هانګ چاو به د سمندري ځواک راتلونکی وزیر وي.
دا په داسې حال کې ده چې، په پاکستان کې د امریکا او ایران ترمنځ دوهم پړاو مذاکرات په ټپه ولاړ دي.
بل لورته د امریکا ولسمشر ډونلډ ټرمپ د تېرې شپې ټروت سوشل خواله رسنۍ د پیغام له مخې د ایران امریکا او اسرائیلو ترمنځ اوربند، چې ټاکل شوې وه د چهارشنبې پر ورځ پای ته ورسېږي، لږ تر لږه دوام لري.
په ورته مهال اسلام اباد لاهم د سولې خبرو لپاره د ایران او امریکا استازو ته هلته د رسېدو لړ کې انتظار کوي.