تاند (یکشنبه د وري – حمل ۳۰مه) د افغانستان د کرکټ بورډ مشر میرویس اشرف په هند کې د کرکټ د ملي لوبډلې د پخواني لوبغاړي شاپور ځدراڼ پوښتنې ته ورغلی او زیاته کړې ده چې، روغتیايي حالت یې د ډاډ وړ دی.
شاپور ځدراڼ له څه مودې راهیسې په هند کې تر درملنې لاندې دی.
میرویس اشرف پرون شنبه ناوخته په خپله فېسبوکپاڼه د شاپور ځدراڼ د ناروغۍ په تړاو ولیکل چې، حالت یې د ډاډ وړ دی او انشاءالله ورځ تر بلې ښه کېږي.
اشرف همداراز په ډاګه کړې، چې د شاپور ځدراڼ ډاکټرانو د هغه بشپړ او جدي درملنې ډاډ هم ورکړی دی.
د افغانستان د کرکټ ملي لوبډلې پخوانی مشهور توپاچونکی، شاپور ځدراڼ له څه مودې راهیسې د ناروغۍ له امله د هند په یوه روغتون کې بستر دی.
شاپور ځدراڼ چې اوس ۳۸ کلن دی، تر یوې نیمې لسیزې زیات وخت د افغانستان کرکټ یو له کلیدي څېرو څخه وو او د خپل هېواد لپاره یې ډېرې نههېرېدونکې لوبې کړې دي.
هغه خپله لومړۍ نړیواله لوبه په ۲۰۰۹ کال کې د هالنډ پر وړاندې وکړه او وروسته یې په مهمو سیالیو لکه د اسیا کرکټ شورا جام، د نړیوال جام د غوراوي سیالیو، د نړیوال جام په څو پړاوونو او نورو نړیوالو سیالیو کې د افغانستان لپاره لوبې وکړې.