تاند (یکشنبه د وري – حمل ۳۰مه) افغانستان کې د طالبانو د حکومت د ترانسپورت او هوایي چلند وزارت د هواپېژندنې ریاست نن ( یکشنبه) د هېواد په ۱۲ ولایتونو کې د ورښت او سېلابونو راوتلو اټکل کړی دی.
د خبرپاڼې مخې، دا ورښت په نورستان، کونړ، لغمان، ننګرهار، کاپیسا، پنجشیر، پروان، بغلان، سمنګان، کندوز، تخار او بدخشان ولایتونو کې اټکل شوی دی.
د اټکل له مخې د یادو ولایتونو په بېلابېلو سیمو کې به د باران کچه له ۱۰ تر ۲۰ ملي مترو پورې وي.
د طالبانو د حکومت د ترانسپورت او هوایي چلند وزارت د هواپېژندنې ادارې همداراز په مرکزي او سویل ختیځو ولایتونو کې د تېزو بادونو، خاورو او دوړو د پېښېدو خبرداری هم ورکړی دی.
د دغو بادونو سرعت په یو ساعت کې له ۵۰ تر ۷۰ کیلو مترو پورې اټکل شوی دی.
دا اټکل داسې مهال اعلانېږي چې، له تېرو څو اوونیو راهیسې د هېواد په یو شمېر ولایتونو کې د سختو ورښتو او سېلابونو له امله نږدې ۲۰۰ هېوادوال مړه او سلګونه نور ژوبل شوي دي.