تاند (دوشنبه د وري – حمل ۱۰مه) د افغانستان او ازبکستان سوداګرو د بلخ ولایت په مزارشریف ښار کې د «ازبکستان ـ افغانستان د سوداګریزو او اقتصادي همکاریو فورم» تر نامه لاندې ګډه ناسته وکړه.
دغه ناسته د دواړو هېوادونو ترمنځ د سوداګریزو او اقتصادي اړیکو د پراختیا او پیاوړتیا په موخه نن دوشنبه د افغان سوداګرو او د ازبکستان د نمنگان ولایت د والي په ګډون جوړه شوې وه.
بلخ کې د طالبانو د سوداګرۍ او پانګونې خونې مشر محمد ابراهیم غضنفر په دې ناسته کې ویلي چې،په ۲۰۲۵ کال کې د دواړو هېوادونو ترمنځ د سوداګرۍ کچه ۱.۸ میلیارده ډالره وه او د دې کچې د لا زیاتېدو لپاره هڅې روانې دي.
د دې ناستې په څنډه کې د ازبکستان د محصولاتو او تولیداتو یو ورځنی نندارتون هم د مزارشریف ښار په یوه سوداګریز مرکز جوړ شو.
د یادونې ده چې، افغانستان کې د طالبانو د حکومت د صنعت او سوداګرۍ وزارت پرون یکشنبه وویل، د افغانستان او ازبکستان د خصوصي سکتورونو ترمنځ د ۵۱۴ میلیون او ۸۰۰ زره ډالرو په ارزښت څو هوکړهلیکونه لاسلیک شوي دي.