تاند (جمعه، د کب/ حوت ۲۲ مه) د مهاجرت نړیوال سازمان ویلي چې د افغانستان او پاکستان ترمنځ روانو بریدونو په تورخم کې د دې ادارې د ترانزیت مرکز ته سخت زیان اړولی دی.
دې سازمان د خپلو کارکوونکو او بشري تاسیساتو د ساتنې غوښتنه کړې ده.
تر دې وړاندې د پاکستان په بریدونو کې په سیمه کې د افغانانو یو لوی بازار د اور خوراک شو او عامو خلکو ته یې تر ۷۰ میلیونه افغانۍ ډېر تاوان واړاوه.
په تورخم کې پرون (پنجشنبه) او وړمه شپه هم نښتې شوي دي.
د مهاجرت نړیوال سازمان د پنجشنبې په ورځ (د ک/ حوت۲۱ مه) په ایکسپاڼه کې د ویجاړ شوې ودانۍ عکسونه خپاره کړل او ویې لیکل: «بشري کارکوونکي او تاسیسات باید تل خوندي وساتل شي.»
د کډوالۍ نړیوال سازمان په وینا، د تورخم دا ترانزیتي مرکز د هغو زیانګالو راستنېدونکو لپاره مهم مرکز و چې مرستو او ساتنې ته اړتیا لري.
د افغانستان او پاکستان ترمنځ جګړه له دوو اوونیو زیات وخت کېږي چې روانه ده. دا نښتې د حوت په اوومه پیل شوې او تر اوسه دواړو لورو ته ګڼې مرګ ژوبلې اوښتي دي. په تېره بیا د پاکستان په بمباریو او د توپونو د ګولیو له کبله په افغانستان کې لسګونه ملکي وګړي شهیدان شوي دي.
ملګري ملتونه هم تاییدوي چې د پاکستان په بریدونو کې په افغانستان کې نژدې ۲۰۰ ملکي وګړي وژل شوي یا ټپیان شوي دي.
په همدې حال کې پاکستاني رسنۍ وايي چې د چین د منځګړتوب د هڅو په نتیجه کې جګړه تر پخوا سړه شوې او پاکستان هوايي بمبارۍ درولي دي خو نور راپورونه وايي چې پاکستان د تېلو د کمښت له بحران سره مخامخ شوی چې له کبله یې د هوايی بریدونو توان کم شوی دی.
سرچینې: تورخم کې د یوه مړي د اېستلو لپاره لنډمهاله اوربند شوی