تاند (دوشنبه، د کب/ حوت ۱۸ مه) د ترکیې ساحلساتو د دوشنبې په ورځ اعلان وکړ چې د انتالیا په ساحلونو کې د یوې کښتۍ د ډوبېدو له امله لږ تر لږه ۱۴ افغان کډوال، چې پکې شپږ ماشومان هم شامل دي، مړه شوي دي.
د ترکیې پولیسو د کډوالو د «غیرقانوني قاچاق او لېږد» په شک شپږ کسان نیولي او ویلي یې دي چې د احتمالي ورکو شوو کسانو د موندلو لپاره د لټون عملیات لا هم روان دي.
د ترکیې د ساحلي ګارد قوماندانۍ په یوه لیکلي بیان کې ویلي چې د دوشنبې په سهار یوه بادي کښتۍ، چې ګڼ شمېر «بې اسناده» کډوال پکې سپاره وو، د ساحلي ګارد د بېپیلوټه الوتکې (ډرون) له خوا د انتالیا په اوبو کې وپېژندل شوه او وروسته دوې بېړۍ د پېښې ځای ته واستول شوې.
په بیان کې راغلي چې یادې کښتۍ، سره له دې چې څو ځله ورته خبرداری ورکړل شو، په تېز سرعت د تېښتې هڅه وکړه. خو لږ وروسته یې ناڅاپه لوری د ساحلي ګارد کښتۍ ته واړاوه او له ټکر وروسته یو شمېر کډوال سمندر ته ولوېدل.
بیان زیاتوي: «په سیمه کې د لټون او ژغورنې د عملیاتو په پایله کې شپږ کډوال او یو تن د انساني د قاچاق په تور شکمن، چې د ترکیې تبعه دی، ژوندي وژغورل شول؛ خو د ۱۴ نورو کډوالو مړي وموندل شول.»
همداراز له دې پېښې وروسته ۱۵ نور کډوال، چې له همدې کښتۍ څخه تښتېدلي وو، د ترکیې د پولیسو په عملیاتو کې ونیول شول.
پولیس وايي چې د ورکو شوو کسانو د کره شمېر د معلومولو لپاره له ژغورل شوو کډوالو سره مرکې روانې دي او د لټون او ژغورنې عملیات هم دوام لري.
د دې پېښې په تړاو د انتالیا څارنوالۍ قضایي څېړنې پیل کړې دي.