کرزی: د نجونو پرمخ دې د ښوونځیو او پوهنتونونو دروازې ژر پرانیستل شي

 تاند (یکشنبه د کب – حوت ۱۷مه) ‏ د افغانستان پخواني ولسمشر حامدکرزي د ښځو نړيوالې ورځې په مناسبت پيغام کې ټینګار کړی، چې د نجونو پر مخ د ښوونځیو او پوهنتونونو دروازې باید ژر تر ژره پرانیستل شي.

هغه په ټینګار سره ویلي چې، ښځو ته د کار او ټولنیز حضور زمینه باید برابره شي؛ څو د هېواد پرمختګ او ځان بسیا تضمین شي.

حامدکرزي د ښځو نړیوالې ورځې په مناسبت په خپل ایکس په خپاره کړي پیغام کې د افغان ښځو تاریخي مبارزې او هڅې ستایلي او ویلي یې دي چې، ښځو د هېواد د پرمختګ او ودې په بېلابېلو پړاوونو کې د نارینه‌وو ترڅنګ مهمه ونډه اخیستې ده.

نوموړي ویلي: «افغان ښځو د افغانستان د پرمختګ او غوړېدو لپاره تل مهم او ارزښتناک رول لوبولی دی».

هغه همداراز ټینګار کړی چې د ټولنې د اوسنیو اړتیاوو پوره کول او د هېواد راتلونکی پرمختګ د ښځو فعال حضور ته اړتیا لري.

کرزي زیاته کړې چې د نجونو د زده‌کړو او د ښځو د کار زمینه باید برابره شي، څو افغانستان د خپلو اولادونو په استعداد او وړتیاوو تکیه وکړي او له بهرنیو مرستو د اړتیا له حالت څخه ووځي.

حامدکرزی په داسې مهال د نجونو پر وړاندې د زده کړو د دروازو د پرانیسو غوښتنه کوي، چې بل لورته بیا په افغانستان کې د ماشومانو لپاره د ملګرو ملتونو صندوق (یونسف)ویلي چې، د دې ادارې ښځینه افغان کارکوونکې له شپږو میاشتو راهیسې خپلو دفترونو ته له تګ منع شوې دي او غوښتنه یې کړې چې دا بندیز باید سمدستي لرې شي.

یونیسف افغانستان د ښځو نړیوالې ورځې په مناسبت په ایکس په خپور کړي پیغام کې د افغان ښځو او نجونو لپاره د حقونو، عدالت او عملي اقداماتو غوښتنه کړې ده.

ادارې ویلي چې د دوی ښځینه ملي کارکوونکو ته له تېرو شپږو میاشتو راهیسې خپلو دفترونو ته د تګ اجازه نه ورکول کېږي.

یونیسف ټینګار کړی چې دا بندیز باید ژر تر ژره لرې شي.

یونیسف همداراز زیاته کړې چې د ښځینه کارکوونکو ونډه د ژوند ژغورونکو مرستو د رسولو لپاره ډېره مهمه ده او د دوی له ګډون پرته د مرستندویه خدمتونو وړاندې کول له ستونزو سره مخ کېږي.