تاند (دوشنبه، د کب/ حوت ۱۱ مه) د نړۍ د کاتولیکانو مشر، پاپ لیو له افغانستان او پاکستان څخه وغوښتل چې بېله ځنډه د خبرواترو لاره جګړه پای ته ورسوي.
پاپ لیو په خپله اوونیزه وینا کې د افغانستان او پاکستان ترمنځ پر روانو تاوتریخوالو اندېښنه څرګنده کړه او پر دواړو هېوادونو یې غږ وکړ چې د جګړې پر ځای د تفاهم او خبرو لاره غوره کړي.
هغه وویل:
«ثبات او سوله د متقابلو ګواښونو یا د هغو وسلو له لارې نه رامنځته کېږي چې ویجاړۍ، درد او مرګ زېږوي؛ بلکې یوازې د معقولو، رښتینو او مسوولانه خبرو له لارې تر لاسه کېدای شي.»
هغه زیاته کړه:
«د یوې داسې تراژیکې پېښې د امکان پر وړاندې چې کېدای شي ډېر پراخ ابعاد ولري، زه په ټول اخلاص له ښکېلو لورو غواړم چې خپل اخلاقي مسوولیت ومني او د تاوتریخوالي دا لړۍ مخکې له دې چې حالت یوې نه جبرانېدونکې پړاو ته ورسېږي، ودروي.»