تاند ( چهارشنبه د کب – حوت ۶مه ) تازه شمېرې ښيي چې په تېر ۲۰۲۵ کال کې افغانستان ته د روسیې د نفتي توکو په صادراتو کې ۲۰ سلنه زیاتوالی راغلی دی.
دا خبر د طالبانو اړوند باختر خبري اژانس خپور کړی دی.
سرچینه وایي ،دا بدلون د دې ښودنه کوي چې کابل د خپلو اړتیاوو د پوره کولو لپاره په سیمه ییزه کچه خپلو ستراتیژیکو همکاریو ته پراختیا ورکړې ده.
د یاد اژانس په وینا، افغانستان ته د روسیې صادرات ۲۰ سلنه زیات شوي، منځنۍ اسیا او افغانستان ته په ټوله کې د روسیې د تېلو په صادراتو کې ۱۵.۵ سلنه وده لیدل کېږي.
دوی وايي؛ بلاروس هم د افغانستان په بازار کې خپله ونډه زیاته کړې او په تېر کال کې یې نږدې ۴۰۰،۰۰۰ ټنه نفتي توکي دغه هېواد ته صادر کړي دي.
د طالبانو صنعت او سوداګرۍ وزارت د مالوماتو له مخې، په ۲۰۲۵ کال کې د کابل او مسکو ترمنځ د سوداګرۍ کچه ۵۳۸ میلیونه ډالرو ته رسېدلې، چې لویه برخه یې ($۴۰۲ میلیونه) پر نفتي توکو (پټرول، ډیزل او ګاز) مشتمله ده.