تاند ( چهارشنبه د کب – حوت ۶مه ) د طالبانو د حکومت ویاند حمدالله فطرت تازه په خپلو څرګندونو کې ویلي چې، د راستنېدونکو کډوالو لپاره د کار فرصتونو برابرولو کمیټې تر دې دمه ۱۶۶ زره او ۷ ماهر او غیر ماهر راستنېدونکي راجستر کړي دي.
فطرت زیاته کړې چې، یاد کسان د کارموندنې په موخه د طالبانو د چارو ادارې عمومي ریاست ته معرفي شوي دی.
د فطرت په وینا، د هېواد په بېلابېلو ولایتونو کې ۶ زره او ۱۴۱ راستنېدونکو ته تخنیکي او مسلکي روزنه هم ورکړل شوې ده.
هغه زیاته کړه چې تر دې دمه د دوه زره راستنېدونکو لیست په مستقیم ډول په بېلابېلو دولتي څانګو کې د کارموندنې لپاره شریک شوي دي.
حمدالله فطرت دا هم وویل چې ۷۷۲ راستنېدونکي په صنعتي پارکونو کې استخدام شوي او د افغان کارګرانو بهر ته د لېږلو په پروسه کې د هغوی لپاره سهمیې ټاکل شوي دي.
دا په داسې حال کې ده چې له ایران او پاکستان څخه د افغان اتباعو د راستنېدو سره د کار فرصتونه کم شوي دي، چې له امله یې په هېواد کې د بې کاره خلکو شمېر زیات شوی دی.
د ملګرو ملتونو د بشري چارو د همغږۍ دفتر (OCHA) وايي چې یوازې په ۲۰۲۵ کال کې شاوخوا ۲.۷۸ میلیونه افغان کډوال هېواد ته راستانه شوي دي.
د اوچا په وینا، شاوخوا ۱.۸۸ میلیونه له ایران څخه او نږدې ۸۹۹ زره له پاکستان څخه راغلي دي.