تاند (چهارشنبې، د کب/ حوت ۶ مه) د امریکا د میشیګان ایالت د ګرانډ ریپډز ښار لوبغاړو، براډ هافرکمپ (Brad Haverkamp) او کیلب ډنګ (Caleb Dang)، د پیکل‌بال په نړۍ کې یو ریکارډ جوړ کړی دی.

 دواړو لوبغاړو په پرله‌پسې ډول ۲۸ ساعته پیکل‌بال لوبه وکړه او د ګینس (Guinness) نړیوال ریکارډ یې په خپل نوم ثبت کړ.

د لوبې په لړ کې، لوبغاړو ته په هر ساعت کې یوازې د پنځو دقیقو وقفه ورکول کېده، چې دا د هغوی د جسمي او ذهني زغم سخته ازموینه وه. کیلب ډنګ ویلي چې له ۲۰ ساعتونو وروسته یې ذهن لکه د «آټو پایلټ» په شان کار کاوه او نژدې و چې بې‌هوښه شي، خو بیا یې هم حوصله ونه بایلله او تر پایه یې لوبه وکړه.

په روانه میاشت کې هغوی ته خبر ورکړل شو چې د دوی دا هڅه د ګینس د نړیوال ریکارډ له خوا تایید شوې ده، او دا نوی نړیوال ریکارډ اوس د دوی په نوم ثبت شوی دی.

دا بریا د پیکل‌بال د مینه‌والو لپاره یوه الهام‌بخښونکې بېلګه ده او د سپورټ په نړۍ کې د عزم، حوصلې او استقامت غوره مثال بلل کېږي. د دواړو لوبغاړو زغم او ژمنتیا ثابته کړه چې انسان کولای شي حتا په محدودو وقفو هم حیرانوونکي کارنامې ترسره کړي.