تاند ( یکشنبه د کب – حوت ۴مه ) د احصایې او معلوماتو ملي اداره وايي، د دوی د مشرتابه د حکم پر بنسټ، د تذکرو د تایید فیس معاف شو.
له دې وروسته به د تایید خدمتونه وړیا ترسره کېږي او مراجعین به د دې خدمت لپاره فیس نه ورکوي.
دغه اداره وايي، هغه تېروتنې چې د کارکوونکو له لوري په تذکرو کې په تېروتنې سره ثبت شوې وي، د اړوندو مسوولانو له تایید وروسته به له فیس پرته اصلاح شي.
یادې ادارې دغه راز ویلي چې، د روان کال په سلواغې میاشت کې د ټول هېواد په کچه ۱۰ زره او ۳۷۴ کسانو ته د زېږون کارتونه وېشلي دي.
د یادې ادارې په خبرپاڼه کې راغلي، چې د کابل ولایت د ۵ زره او ۸۵۵ کارتونو په وېشلو سره تر ټولو ډېره ونډه لرلې ده.
د خبرپاڼې له مخې، ورپسې خوست ولایت د یو زر او ۱۸۳ او ننګرهار ولایت د یو زر او ۶۶ کارتونو په وېشلو سره په دويم او درېیم ځایونو کې قرار لري.