تاند ( چهارشنبه د سلواغې ـ دلوې ۲۹مه) د افغانستان برښنا شرکت اجرایوي ریس ملا عبدالحق همکار په مشرۍ ایران ته تللي پلاوي د ۱۴۰۵ هجري لمریز کال لپاره هم له ایراني لوري سره د برښنا د پېرلو د تمدید قرارداد لاسلیک کړ.
برښنا شرکت نن چهارشنبه په یوه خبرپاڼه کې وویل چې، دا سفر د ایران اسلامي جمهوریت د برښنا مدیریت، لېږد او وېش شرکت (توانیر) په بلنه شوی دی.
د خبرپاڼې پر بنسټ، د برښنا شرکت پلاوي د ایران په پلازمینه تهران کې د برښنا د لېږد د زیربنا د پراختیا او له ایران څخه افغانستان ته د وارد شوي برښنا د پېرلو په اړه په ګډه دوه اړخیزه غونډه کې هر اړخیز بحث هم کړی دی.
سرچینه زیاتوي چې، د طالبانو د حکومت د برښنا شرکت مشرتابه د ګاونډیو برښنا صادرونکو هېوادونو سره د غونډو په ترسره کولو سره همکاري او ګډې اړیکې تر بل هر وخت زیاتې او پیاوړې کړې دي.
د سرچینې په وینا د دې ښو اړیکو په پایله کې د وارداتي برښنا په مختلفو سکتورونو کې ډېرې اسانتیاوې برابرې شوې دي.