تاند (پنجشنبه، د سلواغې/ دلوې ۲۳مه) د امریکا د کانګرس د بهرنیو چارو کمېټې ډیموکرات استازو د ټرمپ د حکومت په دې پرېکړه نیوکه وکړه چې امریکا ته په شرایطو برابر افغانانو لېږد یې درولی او دا کار یې غیراخلاقي او د امریکايي ارزښتونو او ملي ګټو خلاف وباله.
سره له دې چې ډیموکراتان په کانګرس کې فشار راوړي، د امریکا د بهرنیو چارو وزارت یوه جګپوړي چارواکي د چهارشنبې په ورځ وویل چې د ټرمپ حکومت لسګونه افغان پناه غوښتونکي درېیمو هېوادونو ته لېږدوي چې ډېری یې په افریقا کې موقعیت لري.
«د همکارانو پرېښودل د امریکا له ارزښتونو سره په ټکر کې دي»
د ډیموکرات ګوند په مشرۍ د کانګرس یوې ډلې د چهارشنبې په ورځ په واشنګټن کې په یوه غونډه کې وویل چې په افغانستان او سیمه کې د زرګونو پخوانیو همکارانو او کارکوونکو پرېښودل یو «غیراخلاقي» اقدام دی او د امریکا له اساسي ارزښتونو سره په ټکر کې دی.
دیموکراتې استازې کاملاګر-دو، چې د غونډې کوربنه وه، ټینګار وکړ:
«له افغان همکارانو او پخوانیو سرتېرو سره د شویو ژمنو درناوی حزبي موضوع نه ده، بلکې د امریکا له ملي اعتبار سره تړاو لري.»
هغې خبرداری ورکړ چې د دغو کسانو د ملاتړ په برخه کې پاتې راتلل به د امریکا پر ژمنو د نړۍ باور زیانمن کړي.
یوه بل استازي هم په شرایطو برابر افغانانو د دوسیې د څنډې ته کېدو په اړه اندېښنه وښوده او ویې ویل هغه کسان چې یو وخت یې د امریکايي سرتېرو ژوند ژغورلی، اوس تر بل هر وخت عاجلې مرستې او لېږد ته ډېره اړتیا لري.
هغه د ټرمپ د حکومت د کډوالۍ د محدودیتونو یادونه وکړه او خبرداری یې ورکړ چې د دغو پناه غوښتونکو جبري ستنول به هغوی د شکنجې او مرګ له مستقیم خطر سره مخ کړي.
درېیمو هېوادونو ته د لېږد پلان
د امریکا د بهرنیو چارو وزارت د مرستیال سلاکار پاول کپور، د استازو جرګې د بهرنیو اړیکو د فرعي کمېټې په غونډه کې وویل چې قطر او اماراتو ته لېږدول شوي افغانان به درېیمو هېوادونو ته انتقال شي.
دا تګلاره د ټرمپ د حکومت د هغې پالیسۍ په چوکاټ کې ده چې له اسیا او افریقا څخه د پناه غوښتونکو د منلو کچه راکموي. دا مهال د افغانستان په ګډون د لسګونو هېوادونو وګړي امریکا ته د سفر د بندیز په لېست کې شامل دي، هغه بندیز چې د افغانستان د پخوانیو امریکايي همکارانو پر وړاندې هم عملي کېږي.
زرګونه افغانان په نامعلوم حالت کې
جسیکا برډلي راشینګ، چې د «افغاناواک» سازمان مسؤله او پخوانۍ امریکايي سرتېرې ده، وویل چې د ۲۰۲۵ کال له جنورۍ راهیسې امریکا ته د افغان همکارانو د لېږد بهیر په بشپړه توګه درېدلی دی.
هغې زیاته کړه:
«په تېرو څلورو کلونو کې (د ټرمپ له حکومت مخکې) نژدې ۲۰۰ زره افغانان امریکا ته ولېږدول شول، خو اوس دا بهیر په بشپړ ډول بند شوی دی.»
د دې سازمان د شمېرو له مخې، شاوخوا ۲۱۲ زره په شرایطو برابر کسان په افغانستان کې دننه او ۶۰ زره نور په څه باندې ۹۰ هېوادونو کې له نامعلوم برخلیک سره مخامخ دي.
د پخوانیو همکارانو د امنیت اندېښنې
په غونډه کې ضیا غفوري، چې د امریکا د ځانګړو ځواکونو پخوانی ژباړن دی، د افغان همکارانو وضعیت «غمبز» وباله او ویې ویل چې ډېری یې له دوامداره ګواښونو سره مخامخ دي. ده زیاته کړه، هغه کسان چې د طالبانو له وېرې ګاونډیو هېوادونو ته تښتېدلي، د اخراج په صورت کې د نیول کېدو او شکنجې له خطر سره مخ کېږي.
پخوانۍ امریکايي سرتېرې کایلین هنټر د افغان همکارانو پر وړاندې د واشنګټن ژمنتیا «ژوره، اخلاقي او نه معامله کېدونکې» وبلله او ټینګار یې وکړ چې دغو کسانو د امریکايي ځواکونو ترڅنګ جګړه کړې او باید په دې سختو شرایطو کې یوازې پرېنښودل شي.