تاند (دوشنبه، د سلواغې/ دلوې ۲۰ مه) د نن ورځې ځیرک یا سمارټ فونونه له نويو نويو ځانګړتیاوو برخمن دي، له همدې امله اوس ډېری موبایلونه له ۴۰۰۰ څخه تر ۵۰۰۰ mAh او یا تر دې هم د لوړ ظرفیت لرونکې بېټرۍ لري. که څه هم دا بېټرۍ کولای شي یو ورځ یا تر هغې زیات وخت موبایل فعال وساتي، خو د بشپړ چارج کېدو لپاره وخت ته اړتیا لري.
د فاسټ چارجنګ ټکنالوژۍ دا ستونزه تر یوې اندازې حل کړې، خو بیا هم د موبایل کاروونکي باید یو څه وخت د چارج لپاره ولګوي. همدې اړتیا ته په کتو، موبایل شرکتونه د چارج چټکتیا د یوې مهمې بازارموندنې وسیلې په توګه کاروي او ادعا کوي چې موبایل په یوازې ۳۰ دقیقو کې له ۰ څخه تر ۸۰ سلنه چارجېدای شي.
په دې لړ کې یو عام کار چې ډېر کاروونکي یې کوي، دا دی چې موبایل د چارج پر مهال ائیرپلېن موډ ته اچوي. عامه تصور دا دی چې کله په ائیرپلېن موډ کې د موبایل ډېټا، زنګونه او وای فای بند وي، نو موبایل په چټکۍ سره چارج کېږي.
د متخصصانو په وینا، په دې خبره کې یوه اندازه رښتیا شته. له تخنیکي پلوه، په ائیرپلېن موډ کې د موبایل د برېښنا مصرف کمېږي، چې له امله یې د چارج سرعت لږ څه زیاتېږي، خو دا توپیر دومره ډېر نه وي لکه څنګه چې خلک فکر کوي.
د بېلګې په توګه، که یو موبایل په ائیرپلېن موډ کې په ۱ ساعت او ۲ دقیقو کې بشپړ چارج شي، نو هماغه موبایل د موبایل ډېټا او وایفای په فعال حالت کې په شاوخوا ۱ ساعت او ۸ یا ۹ دقیقو کې چارج کېږي. یعنې توپیر یوازې ۴ تر ۷ دقیقو پورې وي.
کارپوهان وايي که کاروونکي د بېټرۍ په اړه د موبایل د جوړوونکو شرکتونو سپارښتنې په پام کې ونیسي، نو نه یوازې موبایل به ښه او پر وخت چارج شي، بلکې د بېټرۍ عمر به هم اوږد او خوندي پاتې شي.