تاند (شنبه، د سلواغې/ دلوې ۱۸ مه) د طالبانو حکومت یو پلان تصویب کړی چې پر اساس به یې بهرنیو پانګهوالو ته د پانګونې په بدل کې له یو تر لسو کلونو پورې د استوګنې جوازونه ورکړل شي.
دا پرېکړه د اقتصادي کمیسیون په منظمه غونډه کې چې د ريیس الوزرا د اقتصادي چارو د مرستیال، ملا عبدالغني برادر، تر مشرۍ لاندې جوړه شوې وه، تایید شوه.
د اقتصادي معاونیت د دفتر د خبرپاڼې له مخې، یوې ځانګړې کمېټې ته دنده سپارل شوې چې د پانګونې د کچې له مخې د استوګنې موده وټاکي، او دا به د مشخصو معیارونو پر بنسټ درجهبندي کېږي.