تاند ( جمعه د سلواغې ـ دلوې ۱۰مه) د افغانستان د فوټسال ملي لوبډلې د ٢٠٢٦ اسیا ملتونو جام سیالیو په دویمه لوبه کې مالیزیا ته ٧ – ٠ ګولونو په ستر توپیر ماته ورکړه.
دغه سیالي د اندونیزیا په کوربهتوب په جاکارتا ښار کې روانې دي.
په دې لوبو کې ١٦ هېوادونو ګډون کړی او د روانې میلادي میاشتې پر ٢٧مه پیل او د فبروري تر ٧مې به دوام وکړي.
افغانستان په D ګروپ کې له سعودي عربستان، مالیزیا او ایران سره سیالۍ کوي.
افغان ملي لوبډله به خپله درېیمه لوبه راتلونکې یکشنبه( د سلواغې، ١٢مه) له ایران سره ترسره کړي.