تاند ( دوشنبه د سلواغې ـ دلوې ۶مه) د طالبانو د حکومت د اطلاعاتو او کلتور وزارت وايي، چې د خبريالانو او رسنيو د پرلپسې شکايتونو له ترلاسه کېدو وروسته يې د رسنيو او خبريالانو د ملاتړو بنسټونو هر اړخيزه ارزونه کړې ده.
ياد وزارت په خپره کړې خبرپاڼه کې زیاته کړې، چې د ترسره شوې ارزونې پر مهال یې معلومه کړه چې، د بنسټونو کثرت او د يو شمېر نهادونو د مسوولينو غيرمسلکي چلند، د دې پر ځای چې د خبريالانو او رسنيو ستونزې حل کړي، هغوی ته يې لا ډېرې ستونزې راولاړې کړې وې.
خبرپاڼه کاږي چې دغو سازمانونو آن په نړيواله کچه یې د افغانستان د رسنيو ملاتړو بنسټونو باور ته زيان رسولی و.
د خبرپاڼې د معلوماتو له مخې، دغه راز يو شمېر بنسټونه له څه مودې را پدې خوا غيرفعال پاتې شوي وو او فعاليتونه يې نه تر سره کول.
د اطلاعاتو او کلتور وزارت زياته کړې، د يادو موندنو پر بنسټ رهبرۍ پرېکړه کړې، چې د هېواد په کچه يوازې د درېيو بنسټونو جوازونه تمديد او د پاتې بنسټونو جوازونه لغوه کړي دي.
یاد وزارت زياتوي، چې ياده پرېکړه به له يوې خوا د خبريالانو او رسنيو د حقوقو د خونديتوب ترڅنګ، د خبريالانو او رسنيو تر نامه لاندې د ناوړه ګټې اخيستنې مخه ونيسي او له بلې خوا به د اړوندو بنسټونو فعاليتونه اغېزمن، منظم او د باور وړ کړي.
خبرپانه کې د هغو درېیو ادارو نومونه نه دي یاد شوي چې، جوازونه یې تمدید شوي دي.
افغانستان کې د رسنیو د ملاتړو سازمانونو مسوولانو تر اوسه په دې تړاو غبرګون نه دی ښودلی.