تاند ( یک شنبه د سلواغې ـ دلوې ۵مه) د طالبانو بهرنیو چارو وزیر، امیرخان متقي د سولې او سیاسي چارو لپاره د ملګرو ملتونو د عمومي منشي مرستیالې «روزمېري ډيکارلو» او مل پلاوي سره کتلي دي.
یاد وزارت لیکلي چې په دې کتنه کې دواړو لوريو د طالبانو د حکومت او ملګرو ملتونو ترمنځ د تعامل، همغږۍ او د دوحې پروسې ناستو په تړاو هراړخيز بحثونه کړي دي.
په تړاو د خپرې شوې خبرپاڼې له مخې په دې کتنه کې متقي د افغانستان په سیاسي وضعیت، امنیت، د اقتصادي ثبات په هڅو او راستانه شویو ګډوالو د ښه مدیریت او هغوی سره د لازمو همکاریو په تړاو د طالبانو د مثبتو ګامونو په اړه خبرې کړې دي.
هغه دغه راز د افغانستان پر بانکونو د محدودیتونو پر لرې کېدو هم ټینګار کړی دی.
بهرنیو چارو وزارت همداراز لیکلي چې بل خوا د ملګرو ملتونو د سرمنشي مرستیالې له هیواده بهر د ملګرو ملتونو د ځینو ادارو د بند پاتې بشري مرستو رسولو کې هم د همکارۍ غوښتنه کړې ده.
هغه دا مرستې افغان ولس ته اړينې بللې دي.