تاند ( پنج شنبه د سلواغې ـ دلوې۲مه) د افغانستان برښنا شرکت وایي، د ازبکستان ۲۲۰ کیلو ولټه وارداتي برښنا مزي یو سرکټ د پلخمري او کابل ترمنځ سیمه کې د واورو او توپان له امله له ستونزې سره مخ شوی دی.
برښنا شرکت زیاته کړې چې، له دې امله په کابل او یو شمېر ولایتونو کې برېښنا پرې شوې ده.
د طالبانو برښنا شرکت نن په یوه پیغام کې زیاته کړې، چې د دې ستونزې له امله د پروان، کاپیسا، پنجشېر، کابل، ننګرهار، لغمان، میدان وردګ، غزني، لوګر، پکتیا، خوست ولایتونه او د بغلان ځینې سیمې د برښنا له کمبود او پرلهپسې پرچاویو سره مخ دي.
برښنا شرکت ویلي، چې په سالنګ کې واوره په شدت وریږي او تخنیکي ټیمونه منتظر دي چې، د وضعیت په ښه کېدو سره د تخنیکي ستونزې ځای پیدا او ستونزه حل کړي.
د یادونې وړ ده چې، له تېرې شپې راهیسې د هېواد د مرکز په ګډون پر ګڼو ولایتونو واوره او باران ووري چې، له امله یې په زیاتو ولایتونو کې لویې او کوچنۍ لارې تړلې دي.