تاند ( چهارشنبه د سلواغې ـ دلوې لومړۍ) افغان کرکټ بورډ ویلي چې، افغان اتلان به نن د افغانستان پرمهال د ماښام په ۷:۰۰ بجو د (اي انډ) جام درې شل اوریزو نړیوالو سیالیو په دویمه لوبه کې د ویسټ انډیز لوبډلې پر وړاندې د سیالۍ دګر ته ښکته شي.
د دغې لوبلړۍ لومړۍ لوبه افغانستان ګټلې ده. په یاده لوبه کې د افغان لوبډلې لپاره ټولو لوبغاړو بهترینه لوبه وکړه.
د افغان لوبغاړو هم توپ وهنه او هم توپ اچونه پر خواله رسنیو وستایل شوه.
که افغان لوبډله نننۍ لوبه وګټي نو لوبلړۍ به د افغانستان په ګټه شي او که ویسټ انډیز لوبه وګټي بیا وروستۍ سیالي نوره هم مهمه کېږي.
کرکټ پوهان وایي، دا سیالۍ نړیوال جام ته د تیارۍ سیالۍ دي او هره لوبډله هڅه کوي بریا خپله کړي څو نړیوال جام ته په لوړ مرام ولاړ شي.