تاند ( دوشنبه د مرغومي ـ جدي ۲۹مه) د اريانا افغان هوايي شرکت نن دوشنبه ویلي، چې د دولتي شرکتونو لوی ریاست د نويو بنسټيزو پرمختګونو په دوام، د دغه شرکت يوه ځانګړې چارټر کارګو (Boeing-737-300) الوتکه نن کابل نړيوال هوايي ډګر ته راورسېده.
دغه الوتکه به د سوداګريزو اموالو د لېږد په موخه د ډهلي سکټور لپاره ځانګړې شي.
د یاد شرکت د مالوماتو له مخې دغه کارګو الوتکه يو مسير د شاوخوا ۱۶.۵ ټنه وزن د لېږد ظرفيت لري او د متحده عربي اماراتو د سرپلیکس قراردادي کمپنۍ سره يې د شپږو مياشتو لپاره رسمي تړون ترسره شوی دی.
د سرچینې په وينا، د کارګو شبکې د پراختيا، د ملي اقتصاد د پياوړتيا، د هوا له لارې د صادراتو او انتقالاتو د زياتوالي او د افغانستان د هوايي ټرانسپورټ د ظرفيت لوړولو په موخه د اريانا هڅې دوام لري.
د اریانا شرکت د مالوماتو پر اساس د دې کارګو الوتکې له لارې به ملي سوداګرو ته دا فرصت برابر شي، ترڅو خپل سوداګريز اموال پر وخت، په ارزانه، خوندي او چټک نړيوالو بازارونو ته ولېږدوي.