تاند ( شنبه د لیندۍ – قوس ۲۲مه) لغمان کې طالب مسوولان وایي چې د دې ولایت په «علیشنګ» ولسوالۍ کې د سلګونه مهماتو یوه ډېپو کشف او ضبط شوې ده.
په دغه ولایت کې دطالبانو امنیتي پولیسو ویلي چې دا ډېپو په سایګل دره کې کشف شوې چې، پکې ۵۱ د هاوان مرمۍ، ۲ هشادو دو مرمۍ، ۲۰۰ د دهشکې مرمۍ، ۱۰۰ د پیکا مرمۍ، یو د پرسونل ضد ماین، ۲۸ د هاوان سرګلولې او ۴ د هشتادو دو سرګلولې شاملې دي.
د مسوولانو په وینا په دې تړاو یې پلټنې پیل کړې دي.
د مالوماتو له مخې بل لورته د طالبانو کورنیو چارو وزارت له تېر یوه کال راهیسې په بېلابېلو ولایتونو کې د غیرقانوني وسلو د ګرځولو او همداراز د مهماتو د قاچاق په تړاو لسګونه کسان نیولي دي.
یاد وزارت ټینګار کړی چې دوی به هېچاته اجازه ورنکړي چې غیرقانوني وسلې وګرځوي او همداراز یې په هېواد کې د وسلو د پخوانیو ډېپوګانو د کشف او ضبط هڅې هم پیل شوې دي.