تاند ( دوشنبه د لیندۍ ـ قوس ۱۷مه) د پښتون ژغورنې غورځنګ د برتانیا په پلازمېنه لندن کې د تېر کال خیبر جرګې د پرېکړو د ملاتړ لپاره پرون یکشنبه ناوخته لویه غونډه وکړه.
دې غونډه کې د برتانیا پر ټولو ایالتونو سربېره د اروپا مختلفو هېوادونو او ان امریکا او کاناډا کې د غورځنګ ځینو غړون ګډون درلود.
په جرګه کې د پښتون ژغورنې غورځنګ مشرانو او ویناوالو د خیبر جرګې پر ملاتړ سربېره د افغان نجونو د زدکړو پر حق ټینګار وکړ.
دوی په پښتونخوا او بلوچستان سربېره افغانستان کې د پاکستان بریدونه وغندل او هم یې د درېدو غوښتنه وکړه.
د غونډې ویناوالو پاکستان د پښتنو پر رواني، اقتصادي او ټولنیزه نسل وژنه تورن کړ.
په دغه غونډه کې پر پښتون ژغورنه غورځنګ د پاکستان بندیزونه وغندل شول.
پښتون ژغورنې غورځنګ د ۲۰۲۴ کال اکتوبر کې خیبر جرګه را بللې وه، چې د پاکستان حکومت یې د مخنیوي ډېره هڅه وکړه.
هغه وخت پاکستان د جرګې په مخنیوي کې پاتې راغی خو پر غورځنګ یې بندیزونه ولګول او له هغه راهیسې یې د دوی غړي هم ونیول او دا لړۍ لا هم روانه ده.