تاند ( دوشنبه د لیندۍ ـ قوس ۱۰مه) د امربالمعروف، نهې عن المنکر او د شکایتونو اورېدلو وزارت ویاند سیفالسلام خیبر وايي، چې پرون ماښام شاوخوا شپږ بجې د فاریاب ولایت په مرکز میمنه کې د احتمالي بريد هڅه ناکامه کړای شوه.
د خيبر په وينا، یوه کس هڅه کوله چې د دغه وزارت پر ریاست برید وکړي، خو د امنیتي ځواکونو له لوري مخکې تر دې چې دغه کس خپلې موخې ته ورسېږي، نيول شوی دی.
خیبر وایي د دوی امنيتي ځواکونو تر دې وړاندې هم پر مرکز کابل سربېره يو شمېر ولايتونو کې د ورته احتمالي بريدونو مخې نيولې دي.
د دې برید د انګیزې په اړه لا څه نه دي ویل شوي او لا معلومه هم نه ده چې، بریدګر څوک او ولې یې دا کار کاوه.