تاند (دوشنبه د لیندۍ ـ قوس ۱۰مه) د افغانستان د سوداګرۍ او پانګونې خونې مرستیال خان جان الکوزی وايي، د پاکستان له‌خوا د تورخم او سپین‌بولدک د لارو موقتي پرانیستنه باید د «انساني همدردۍ» په نوم توجیه نه‌شي.

هغه وایي، طالبان دې د دوامداره نړیوال تضمین تر ترلاسه کېدو مخکې دغه لارې نه پرانيزي.

الکوزي په خپله رسمي اېکس پاڼه کې د یوې خپرې شوې ویډیو په ترڅ کې لیکلي، چې د پاکستان له‌خوا د افغان صادراتو د بندېدو له امله د افغانستان سوداګرو ته پراخ مالي زیانونه اوښتي دي.

د ده په وینا، پاکستان اوس خپله د زیان او فشار له امله هڅه کوي د «انساني همدردۍ» تر عنوان لاندې دروازې پرانیزي.

نوموړي ټینګار کړی چې افغان سوداګرو بدیلې لارې موندلې او په پوره توګه په پاکستان تکیه نه کوي.

د سوداګرۍ خونې مرستیال زیاته کړې، تر هغو چې د دواړو هېوادونو د سوداګرۍ لپاره روښانه او لیکلی نړیوال تضمین ترلاسه نه شي، حکومت باید له پاکستان سره د سوداګرۍ د بشپړ پرانیستلو اجازه ور نه کړي.

پاکستان په وروستیو ورځو کې د انساني مرستو لپاره د لارو د خلاصون خبر ورکړی، خو افغان سوداګر او د سوداګرۍ خونې چارواکي ټینګار کوي چې دا ګام باید د اوږدمهاله اقتصادي هوکړو او تضمین تر ترلاسه کېدو وروسته عملي شي، څو په راتلونکي کې د دواړو هېوادونو سوداګر د ورته ستونزو له تکرار سره مخ نه شي.

پر خواله رسنیو هم افغانان د دغو لارو د بندپاتېدو غوښتنه کوي او وایي چې، حکومت دې د پاکستان پر وړاندې دروازې د دوه نورو میاشتو لپاره هم بندې وساتي څو د هغوی د میوو سیزن تېر او زموږ د سوداګرو د زیان جبران وشي.

خان جان الکوزي هم د خبرو په پای کې له ټولو افغانانو غوښتي چې د هغه غږ بدرګه کړي.