تاند ( دوشنبه د لیندۍ ـ قوس ۱۰مه) د هرات ولایت د رسنیو دفتر وايي، چې د روان لمریز کال په لومړیو اوو میاشتو کې له دې ولایت څخه ۱۹ میلیونه او ۹۷۱ کیلوګرامه وچه مېوه نړیوالو بازارونو ته صادره شوې ده.
د سرچينې په وينا، د دغو صادراتو مالي ارزښت شاوخوا ۵۷ میلیونه او ۷۰۰ زره ډالرو ته رسېږي.
دا اندازه د تېرو درېيو کلونو د همدې مودې په پرتله درې برابره زیاتوالی ښيي.
د سرچینې د معلوماتو له مخې، د هرات وچې مېوې اترېش، بلجیم، کاناډا، هالنډ، المان، امریکا، ایران، قطر، ترکیې، هند، سعودي عربستان او یو شمېر نورو هېوادونو ته صادرې شوې دي.
طالب مسوولان وايي، د پروسس کارخونو فعالېدو، د صادراتو د لارې اسانتیاوو او نړیوالو بازارونو ته د افغان محصولاتو په لاسرسي کې د ښه والي له امله د صادراتو کچه لوړه شوې ده.
اقتصاد پوهان هم دا خبرونه هیله بښونکي یادوي او پر طالبانو غږ کوي چې، د صادراتو کچه لا لوړه او وارداتو کچه راکمه کړي.
دوی وایي د صادراتو په زیاتوالي سره کاري فرصتونه لا پسې غوړېږي.