تاند (دوشنبه، د لیندۍ/ قوس ۳ مه) په دوبۍ کې Ciel Dubai Marina هوټل، چې د IHG د Vignette ټولګې نوې برخه ده، د اماراتو په دوبۍ کې د اسمانڅکو ودانیو په ډله کې شامل شو.

دا هوټل ۳۷۷ متره لوړوالی، ۸۲ پوړونه او ۱۰۰۴ خونې او سویټونه لري. لاندې د دې ریکارډ جوړوونکي جوړښت منځ ته یوه لنډه کتنه کوو.

ټولې خونې تر چت پورې شیشې لري

د دې لپاره چې مېلمانه د پالم جمیرا، د دوبۍ د افق کرښې او د عربي خلیج له پراخو پانورامیکو منظرو اعظمي خوند واخلي، د خونو کړکۍ له مځکې تر چته شیشه‌يي جوړې شوي چې د پالم جمیرا او عربي خلیج په شمول د لیدو وړ مهمې ځایونه ورڅخه ښکاري.

د ګرځندوی وده او د دوبۍ نوې نښانه

تېر کال دوبۍ ته ۱۸.۷ میلیونه نړیوال سیلانیان ورغلي وو چې د ۲۰۲۳ پرتله ۹٪ زیات وو. د ۲۰۲۴ په اوږدو کې د ګرځندوی په سکتور کې بهرنۍ پانګونې له ۲ میلیارده ډالرو واوښتې. Ciel Dubai Marina د شتمنو سیلانیانو د جذبولو په هدف جوړ شوی دی.

د هوټل اجرایي رئیس، هاینریش موریو، وویل:
«موږ ډېر خوښ یو چې په Ciel Dubai Marina کې چې خورا لوکس، د جوړښت له پلوه نوی او خلاقانه دی، د مېلمنو هرکلی کوو.»

هغه زیاته کړه چې دا ودانۍ د دوبۍ نړیوال اهمیت، سوداګري او ګرځندوی پرمخ بیايي، او مېلمنو ته داسې تجربه وړاندې کوي چې هم ځانګړې ده او هم نه هېرېدونکې.

د اسمان پر لور ډیزاین

دا ودانۍ د NORR معمارانو ډیزاین کړې ده. د برج ټوله مفکوره د “لوړوالي” پر محور ولاړه ده.

په ۷۶م پوړ کې د نړۍ تر ټولو لوړ سرخلاصی انفینټي حوض جوړ شوی چې سمندر ته مخامخ دی، او د برج په سر کې د لیدلو ځانګړې ساحه شته چې د افق منظره ورڅخه ښکاري.

معماران وایي چې د Ciel ډیزاین د «پېچلو تخنیکي ستونزو، د سرچینو د اغېزمنتیا او پایښت» لپاره حل لارې وړاندې کوي.

۸ رستورانونه او ۲۴ ساعته جېم

د هوټل امکانات د هغه د ډیزاین په شان ښايسته او پرتمین دي.

رستورانونه

هوتل  ۸ بېلابېل خوړنځایونه لري:

•  West 13 →  د مدیترانې خواړه؛ په لاس جوړه پاسته، ګایرو، ټاکو، مزه، راز راز خواږه (پیستري) او وچې ډوډۍ.
• East 14 → د آسیا بوفې؛ ژوندی رامن، فو، سوشي، ډیم‌سام او کري.
• Risen Café & Bakery → تازه او توده وچه ډوډۍ او قهوه، ناشته، غرمنۍ او د ورځې په اوږدو کې مینو.
• تر ټولو زړه راښکونکی Tattu دی – یو معاصر آسیایي کانسپټ له بریتانیا څخه، چې درې څانګې لري:
  • Tattu Restaurant & Bar
  • Tattu Sky Pool
  • Tattu Sky Lounge

اسماني تجربې

• په ۷۴م پوړ کې Tattu مېلمانه د “لرغونو اسطورو، معاصر هنر او نوې چینایي–جاپاني اشپزۍ” نړۍ ته ننباسي.
• په ۷۶م پوړ کې، چې ۳۱۰ متره لوړ دی، Tattu Sky Pool دی چې د ورځې ارامه فضا او له لمر لوېدو سره د موسیقۍ DJ ناستې لري.
• په ۸۱م پوړ کې Sky Lounge & Terrace دی چې موسیقي، کاکټیلونه او ۳۶۰ درجې منظرې لري.

نور امکانات

• ۲۴ ساعته عصري جېم د دوبۍ د افق له منظرو سره.
• په ځمکني (ګراونډ) پوړ کې مېلمنو ته د پالم جمیرا Soluna Beach Club  مهیا دی.
• د ۲۰۲۶ په فبرورۍ کې به په ۶۱م پوړ کې سپا پرانیستل شي.