تاند (جمعه د لړم ـ عقرب ۳۰مه) د اریانا افغان هوایي شرکت رییس بخت الرحمن شرافت رسنیو سره خبرو کې ویلي، ډېر ژر به د سوداګریزو توکو د ټرانزیټ لپاره ځانګړې چارټر الوتکې وپېري.
شرافت ویلي، دغه الوتکې به د بوینګ یا ایربس ډوله وي.
د دغو الوتکو بیه شاوخوا ۳۵میلیونه ډالر ښودل کېږي.
نوموړي ویلي، د نویو الوتکو پېرلو سره به نړیوالو بازارونو ته د افغاني تولیداتو د صادراتو لېږد کچه کې هم زیاتوالی راشي.
اریانا افغان هوایي شرکت څو ورځې وړاندې په ټیټه بیه بهرنیو هېوادونو ته د افغانستان وچو او تازه مېوو د صادراتو لړۍ پیل کړه.
د یادونې ده، چې تر دې وړاندې اقتصادي مرستیال اریانا افغان هوایي شرکت ته د کارګو الوتکو د پېرلو سپارښتنه کړې وه.