تاند ( دوشنبه د لړم ـ عقرب ۲۶مه) د پاکستان د بهرنیو چارو وزارت ویاند طاهر حسین اندرابي وايي، چې اسلام اباد د طالبانو او پاکستان ترمنځ د شخړو د حل په موخه د منځګړتوب وړاندیز ته هرکلی وايي او له دې فرصت به تېښته نه کوي.
اندرابي د هغو راپورونو په غبرګون کې چې ګواکې تهران هڅه کوي د پاکستان او طالبانو ترمنځ د منځګړیتوب لپاره یوه سیمه ییزه غونډه ترسره کړي، د قدرادانۍ په ډول ویلي چې ایران یې ورور او دوست هېواد دی.
ډان نیوز د راپور له مخې اندرابي ټینګار کړی، چې پاکستان تل د خبرو اترو او ډېپلوماټیکو لارو چارو له لارې د ستونزو د حل ملاتړی او د ایران د منځګړتوب د وړاندیز خورا قدر کوي.
اسلام اباد دغه راز له طالبانو غواړي، چې د پاکستان پر ضد د فراملي ترهګرۍ د مخنیوي لپاره ګامونه پورته کړي؛ خو طالبانو د دغه هېواد ادعاوې چې له افغانستان څخه د بریدونو د تنظیم لپاره کار اخېستل کېږي رد کړې دي.
دا په داسې حال کې ده چې تر دې وړاندې د ترکیې په استانبول او د قطر په دوحه کې د طالبانو او پاکستاني لوري ترمنځ د سولې درې پړاوه مذاکرات ترسره شول؛ خو هغه مذاکرات پرته له کومې هوکړې درېدلې دي.