تاند ( پنجشنبه د لړم ـ عقرب ۲۳مه) د طالبانو بهرنیو چارو وزیر، امیرخان متقي په کابل کې د اسلامي همکاریو سازمان له استازي، طارق علي بخیت سره کتنه کې پاکستان سره پر وروستیو ترینګلتیاوو خبرې کړې دي.
امیرخان متقي د افغانستان لپاره د اسلامي همکاریو سازمان استازي ته د طالبانو او پاکستان ترمنځ د خبرو اترو په تړاو معلومات ورکړي او ټينګار یې کړی، چې د شخړو حل د خبرو له لارې غواړي.
د خبرپاڼې له مخې، په دې کتنه کې د اسلامي همکاریو سازمان استازي، طارق علي بخیت هم د پاکستان او طالبانو د اوربند د دوام هرکلی کړی او د خبرو پر دوام یې ټینګار کړی.
د طالبانو په خبرپاڼه کې ویل شوي، چې په دې کتنه کې پر امنیتي، د افغان کډوالو پر وضعیت او هغوی سره د OIC پر مرستو هم خبرې شوې دي.
طالبان داسې مهال یو ځل بیا پاکستان سره د خبرو لپاره ځان چمتو ښيي، چې د روسیې او ایران بهرنیو چارو وزیرانو هم په وروستۍ ټيلیفوني مکالمه کې د دواړو غاړو ترمنځ د تاوتریخوالي پر دوام اندېښمنه ښودلې او پر خبرو یې ټینګار کړی.
دا په داسې حال کې ده چې د طالبانو او پاکستان ترمنځ د استانبول درېیم پړاو مذاکرات بې پایلې پای ته رسېدلې دي، او د بیا پیل لپاره یې تراوسه منځګړو او یا دواړو غاړو کوم عملي چمتوالی نه دی ښودلای.