تاند ( دوشنبه د لړم ـ عقرب ۱۹مه) د طالبانو د بهرنیو چارو وزارت ویلي، د جرمني بن ښار کې به نن دوشنبه د افغانستان د جنرال کونسلګري فعالیتونه بېرته له سره پیل شي.
د بهرنیو چارو وزارت په خبرپاڼه کې راغلي، هېوادوال او نور مراجعین کولی شي په انلاین بڼه نوبت واخلي او د خپلو کارونو لپاره مراجعه وکړي.
یاد وزارت ویلي، نږدې راتلونکي کې به دغه کونسلګري د پاسپورټ چاپ چارې هم پیل کړي.
د جرمني بن کې د یادې کونسلګرۍ فعالیتونه میاشت وړاندې له هغه وروسته ودرېدل کله، چې هلته د تېر جمهوریت ډیپلوماټانو په ډلهییزه توګه استعفا وکړه.
له استعفاء وروسته جرمني په بن او برلین کې د طالبانو د حکومت کونسلي کارکوونکو ته باورلیکونه ورکړل.