تاند (یکشنبه، د لړم/ عقرب ۴ مه) ترکمنستان اعلان کړی چې د TAPI پایپلاین له لارې به د ۲۰۲۷ کال په پیل کې افغانستان ته د طبیعي ګازو صادرات پيل کړي، ځکه چې په افغانستان کې د یادې پروژې د جوړولو کار وروستیو پړاوونو ته رسېدلی او سیمهییزې هوکړې هم د نهايي کېدو په حال کې دي.
محمد مراد امانوف، چې د TAPI پایپلاین د پروژې مشر دی، دولتي رسنیو ته ویلي چې د افغانستان په برخه کې د نللیکې د جوړولو چارې به د راتلونکي کال تر پایه بشپړې شي.
امانوف زیاته کړه چې له ترکمنستانه به د ګازو صادرات هغه مهال پيل شي چې د افغانستان اړوندې زیربناوې چمتو او فعالې شي. له پاکستان سره د لازمو تړونونو پر نهايي کېدو خبرې هم وروستیو مرحلو ته رسېدلې دي.
هغه وویل:
«موږ هڅه کوو چې پاکستان د هغو موافقو برخهوال کړو چې راتلونکي پانګونې خوندي کړي او پانګوالو، دولتي ادارو او مالي بنسټونو ته ډاډ ورکړي.»
امانوف څرګنده کړه چې د اړینو قراردادونو تر ۹۰٪ څخه ډېر کار بشپړ شوی او خبرې په وروستۍ پړاو کې دي.
د ټاپي نللیکې پروژه چې ترکمېنستان، افغانستان، پاکستان او هند سره نښلوي، په کال کې ۳۳ میلیارد متر مکعب ګاز د ترکمېنستان له «ګالکینیش» څخه لېږدوي. ترکمنستان د نللیکې خپله برخه بشپړه کړې ده.
د افغانستان په هرات ولایت کې د نللیکې د اېښودو کار پیل شوی او تر اوسه تر لس کیلومتره زیاته نللیکه ځای پر ځای شوې ده.
د تورکمنګاز مشر، مکسات بابایف، وویل چې لومړني صادرات به افغانستان ته په کال کې ۵۰۰ میلیون متر مکعبه وي، چې وروسته به د زیربناوو له پراختیا سره ۱.۵ میلیارد مکعب مترو ته ورسېږي. دغه پروژه چې څو ځله ځنډېدلې، د سیمې د اقتصادي یووالي لپاره ستراتيژیک اهمیت لري.