تاند ( جمعه د لړم ـ عقرب ۲مه) د خوست په ځاځي ميدان ولسوالۍ کې پر ډيورنډ کرښه د طالب ځواکونو او پاکستاني ملیشو ترمنځ وروستيو نښتو له امله ۳۵۰ کورنی بېځايه شوي دي.
خوست ولايت مقام کې د طالبانو وياند مستغفر ګربز رسنیو ته ویلي چې، د جګړو پرمهال پاکستاني پوځي رژيم د جګړې له قوانینو سرغړونه کړې وه او د عامو خلکو هستوګنځي یې په نښه کړي چې له امله یې لسګونه کورنۍ له خپلو مېنو بېځایه شوې دي.
د ګربز په خبره چې يادې کورنۍ اوس تر خېمو لاندې د غرو په لمنو کې شپې او ورځې سبا کوي او ځينې هغه يې د خپلوانو کورونو کې مېشت دي.
د نوموړي په خبره د خوست ولایت مقام په لارښوونه، د افغان سرې میاشتې د بیړني غبرګون ډلې له لوري ترسره شوې سروې ښيي، چې د وروستيو نښتو له امله شاوخوا ۳۵۰ کورنۍ بېځایه شوې دي.
ګربز همداشان وويل چې د پاکستاني ملیشو په بريدونو کې ۳ ملکي وګړي ټپیان شوي او د سيمې د خلکو نږدې ۳۰ څاروي لهمنځه تللي دي.