تاند (پنجشنبه، د تلېږ میزان ۲۴ مه) د متحده عربي اماراتو رسنۍ وايي، د دوبۍ یوه استوګن افغان وګړي په تاریخ کې نوی باب پرانیستی، ځکه چې هغه لومړی افغان شو چې د دوبۍ ډیوتي فري (Dubai Duty Free – DDF) د “میلینیوم میلیونر” په نوم لاټرۍ کې یو میلیون امریکایي ډالر وګټل — دا لړۍ له ۱۹۹۹ کال راهیسې روانه ده.
محمد خان بارکزی، ۴۴ کلن افغان تبعه دی چې له ۲۰۱۴ کال راهیسې په دوبۍ کې اوسیږي، د “میلینیوم میلیونر” د ۵۱۹مې دورې بختور ګټونکی شو. هغه د ۱۷۰۰ شمېر ټکټ د سپتمبر په ۲۳مه نېټه آنلاین اخیستی و.
بارکزی، چې درې ماشومان لري او په “بزنس بې” سیمه کې د داخلي ډیزاین یا د کورونو د دیکوراسیون یو شرکت چلوي، د چهارشنبې په ورځ د دوبۍ د نړیوال هوایي ډګر په “Concourse D” کې د دوبۍ دیوټي فري په وروستۍ قرعهکشي کې دا جایزه وګټله.
هغه د جایزې تر ګټلو وروسته وویل:
“ډېره مننه، دوبۍ ډيوټي فري! دا زما د ژوند ارمان و چې یو وخت به ستاسې دا بخت ازموینه (لاټري) وګټم، او زه باور لرم چې دا به حتماً پیښیږي — او بالاخره وشول! زه تل باور لرم چې ستاسې لاټري د نړۍ تر ټولو رښتینې ده.”
محمد خان بارکزی د افغانستان د هلمند ولایت اوسېدونکی دی او څلور کاله کېږي چې په لاټرۍ کې برخه اخلي. هغه اوس د خپلو هېوادوالو لپاره د دې مشهوري نړیوالې قرعهکشي لومړی افغان بریالی استازی شو.
هندي وګړی هم میلیونر شو
له بارکزي سره یو ځای، د سعودي عرب په “تبوک” ښار کې مېشت ۴۷ کلن هندی تبعه، ډاني ټېلیس (Danny Telis)، هم د “میلینیوم میلیونر” د ۵۱۸مې دورې ګټونکی شو او یو میلیون ډالر یې وګټل. هغه د سپتمبر په ۲۳مه نېټه د دوبۍ د نړیوال هوایي ډګر په “Terminal 2” کې ۰۵۴۲ نمبر ټکټ اخیستی و.
ټېلیس چې درې کاله کېږي په تبوک کې اوسیږي، له پنځو کلونو راهیسې د دوبۍ د ډیوټي فري په لاټرۍ کې برخه اخلي. هغه د ودانیزو چارو مدیر او د دوو ماشومانو پلار دی، او د هند د ممبۍ ښار اوسېدونکی دی.