تاند (یکشنبه، د تلې/ میزان ۱۳ مه) د کندهار چارواکي وایي چې سرحدي پولیسو د احمدشاه بابا د نړیوال هوايي ډګر له لارې د ۱۳۹ تاریخي سکو د قاچاق هڅه ناکامه کړې ده.
د کندهار د اطلاعاتو او کلتور ریاست د هنر او کلتور آمر عبدالشكور څپاند باختر خبري آژانس ته ویلي چې دا سکې د پاچا امانالله خان او پاچا ظاهر شاه د واکمنیو په دورو پورې تړاو لري.
چارواکو ویلي، یوه افغان تبعه هڅه کوله چې دا سکې د متحده عربي اماراتو دوبۍ ښار ته انتقال کړي.
د اطلاعاتو او کلتور ریاست خبرپاڼې له مخې، دا تاریخي سکې به له پاکولو او ترمیم وروسته د کندهار په موزیم کې نندارې ته کېښودل شي.