تاند ( شنبه د تلې – میزان ۱۳مه)د طالبانو د حکومت د کورنیو چارو وزارت ویلي، چې ځواکونه یې تر دې وروسته رېنجر موټر دروي او نور یې نه کاروي.
د یاد وزارت ویاند عبدالمتین قانع په یوه وېډیو پیغام کې ویلي چې، دوی د رېنجر پر ځای نور ګاډي کاروي.
قانع زیاته کړې چې، د رېنجر پر ځای به داسې ګاډي وکاروي چې د افغانستان له جغرافیې سره جوړ او د امنیت و خدماتو په چمتو کولو کې تاثیر لرونکي وي.
نوموړي روښانه کړې نه ده چې کوم موټر به د رېنجر پر ځای کاروي.
طالبانو ویلي چې، رېنجر موټر ډېر سون توکي سوزوي او د تخنیکي ستونزو د حل پرمهال یې پرزې قیمته دي.
د موټرو تخینکي انجینران وایي، رېنجر ځواکمن ګاډي دي.
دغه ګاډي افغانستان ته د امریکا د راتلو سره د جمهوریت پرمهال د افغان حکومت ځواکونو ته ورکړل شول.
په خواله رسنیو کې هم د طالبانو د حکومت د دغه اقدام په تړاو خلکو بېلابېل نظریات څرګند کړي، چا ستایلی او چا بیا نیوکه کړې ده.