تاند (ينحشنبه، د تلې/ میزان ۳ مه) اروپايي اتحادیې یو تجربهکار فرانسوی دیپلوماټ، ګیلس برتراند د افغانستان لپاره د خپل نوي ځانګړي استازي په توګه ټاکلی دی. دغه دیپلوماټ، په اروپايي اتحادیه کې له شلو کلونو څخه ډېره تجربه لري.
برتراند په مارسي ښار کې زېږېدلی او د سوداګرۍ مدیریت او سیاسي علومو په برخه کې یې زدهکړې کړي دي. هغه د بهرنیو چارو او نړيوالو همکاریو په ډګر کې اوږده لاره وهلې ده.
برتراند پخوا د اروپايي اتحادیې د استازولۍ په چوکاټ کې په افغانستان کې دنده ترسره کړې او وروسته یې د نورو لوړو مسوولیتونو مشري پر غاړه اخیستې وه.
د هغه له مهمو دندو څخه یوه د بروکسل د غونډو د ټیم مشري وه چې د سوریې د بحران په اړه جوړېدې. همداراز، هغه د اروپايي اتحادیې شارژدافېر او د سوریې په چارو کې د استازولۍ مشر و چې په بیروت کې مېشت و.
برتراند د اروپايي اتحادیې په چوکاټ کې په پراخه کچه له ګاونډیو هېوادونو او له عربي – اسلامي نړۍ سره د اړیکو په برخه کې کار کړی دی.
د اروپايي اتحادیې د سرچینو په وینا، د برتراند په نوې دنده کې به له افغانستان سره د اروپايي اتحادیې د اړیکو پراختیا، د دیپلوماټیکو همکاریو څارنه او د سیمې له ادارو سره د ثبات او امنیت د پیاوړتیا لپاره کار شامل وي.
اروپايي اتحادیې تل هڅه کړې چې د خپلو ځانګړو استازو او سفیرانو له لارې په سیمهییزو او افغان مسایلو کې فعال رول ولوبوي. په دیپلوماتیکي او سیمه ییزو مسلو کې د ګیلس برتراند پراخې تجربې ته په پام، د هغه ګومارنه د بروکسل د دیپلوماټیک حضور د پیاوړتیا لپاره یوه هڅه بلل کېږي.