تاند (سې شنبه، د وږي/ سنبلې ۴ مه) د افغانستان د طالبانو حکومت د کاري فرصتونو د رامنځته کولو او د متوازن پرمختګ د پیاوړتیا په هدف د سې شنبې په ورځ پنځه کلنه ” پراختیايي ستراتیژي” اعلان کړه.
د طالبانو د حکومت ویندوی ذبیح الله مجاهد وویل، دا ستراتیژي د دریو بنسټیزو ستنو پر محور ولاړه ده: ښه حکومتولي، نړیوالې اړیکې، او امنیت او عام نظم.
هغه زیاته کړه:
«په دې ستراتیژۍ کې لس سکتورونه شامل دي: اقتصاد او کرنه؛ طبیعي سرچینې او انرژي؛ کور جوړونه او ټولنیز یووالی؛ ترانسپورت او مخابرات؛ تعلیم (دیني او عصري دواړه) او فرهنګي چارې؛ روغتیا؛ ټولنیزه ساتنه؛ او د چاپېریال ساتنه.»
دا لومړی ځل دی چې په تېرو څلورو کلونو کې چې طالبان بیا واک ته رسیدلي، د جګړه ځپلي هېواد لپاره اوږدمهال پرمختیايي پلان وړاندې کوي.
مجاهد پنځلس مهم پروګرامونه تشریح کړل، چې پکې د شریعت پلي کول او د اسلامي عدالت تامین، د حکومتدارۍ او شفافیت پیاوړتیا، سیمه ییزه همکاري او د سرحدونو امنیت شامل دي.
نورې طرحې د کرنې پراختیا، د انرژۍ تولید او رسولو، د روغتیا او تعلیم د پیاوړتیا، د ترانسپورتي زیربناوو او د مخابراتو د پراختیا په برخه کې تمرکز لري.
د مجاهد له لوري په پنځه کلنه ستراتیژۍ کې د نجونو د ښوونځیو د پرانستلو یادونه نه ده شوې او دا اټکل هم نه دی شوی چې د نجونو له زده کړو پرته به پنځه کاله وروسته د افغانستان د روغتونونو او نورو ادارو څه حال وي.
مجاهد وویل:
«زه ټولو هېوادوالو ته ډاډ ورکوم چې د دې اوږدمهاله ستراتیژۍ عملي کېدا به غوره پایلې ولري، او د اصلي اهدافو د ترلاسه کولو لپاره اړین اقدامات به په یو منظم او ترتیب شوي چوکاټ کې پرمخ یووړل شي.»
دا اعلان د افغانستان د اقتصادي ستونزو په منځ کې شوی، ځکه چې امریکا د ۲۰۲۱ کال له اګست وروسته لا هم د افغانستان ۷ میلیارد ډالره شتمني کنګل کړې ده.
افغانستان ټولټال ۹ میلیارده ډالره بهرنۍ شتمني یا اسعاري زېرمه لري، چې ۷ میلیارده یې په امریکا کې دي او پاتې یې په جرمني، متحده عربي اماراتو او سویس کې ساتل کېږي.