تاند (چهارشنبه، د زمري/ اسد ۲۹ مه) د طالبانو د دفاع وزیر محمد یعقوب مجاهد د سېشنبې په ورځ له سیمهییزو او نړیوالو قدرتونو وغوښتل چې د افغانستان په وړاندې له “ناوړه نیتونو” ډډه وکړي، ویې ویل چې د طالبانو “حکومت” غواړي د اسلامي اصولو پر بنسټ له ټولو هېوادونو سره ښې اړیکې ولري.
هغه د افغانستان د خپلواکۍ د ورځې په نمانځغونډه کې وویل چې طالبان نه غواړي افغانستان د لویو قدرتونو لکه د امریکا، روسیې او چین د سیالیو ډګر شي.
یعقوب وویل:
“زموږ پیغام ګاونډیانو، سیمهییزو قدرتونو او نړۍ ته دا دی: که څوک د افغانستان په اړه ناوړه نیتونه لري، پرې دې یې ږدي. افغانستان تاسو ته کوم بد نیت نه لري. موږ له ټولو سره د اسلامي شریعت پر بنسټ ښې اړیکې غواړو.”
د طالبانو حکومت له پاکستان پرته له نورو ګاونډیانو سره نسبتاُ ښې اړیکې لري. پاکستان، چې د طالبانو حکومت د ټي ټي پي په ملاتړ تورنوي، په وروستیو کې د طالبانو مخالفانو ته بلنه ورکړې چې په اسلام اباد کې سره راټول شي.
یعقوب زیاته کړه:
“نه روسان او نه هم چینایان داسې فکر کوي چې افغانستان به د امریکا په اشاره د دوی پر ضد عمل وکړي یا به خپله خاوره د دوی پر ضد وکاروي. او امریکایان هم باور نه لري چې روسیه یا چین به راشي او دا خاوره به د هغوی پر ضد وکاروي. راځئ سوداګري وکړو. راځئ د بندونو، سړکونو، فابریکو، پانګونې او برېښنا پروژو په جوړولو کې یو له بل سره سیالي وکړو — نه د شخړو له لارې.”
یعقوب مجاهد دا هم وویل چې افغانانو څو ځله خپله خپلواکي په سمه توګه نه ده ساتلې، خو ده د ۲۰۲۱ کال په اګست کې د طالبانو بېرته واک ته رسېدا د خپلواکۍ نوی ډول وباله. هغه پر یووالي ټینګار وکړ څو د “فتنو او وېش” مخه ونیول شي. ښاغلي مجاهد په عین حال کې د خلکو او طالبانو ترمنځ د بېباورۍ د خپرولو د هڅو په اړه خبرداری ورکړ.
هغه وویل:
“باید له ماضي څخه درس واخلو. هر څوک چې هڅه کوي وېش رامنځته کړي — که د حکومت او خلکو ترمنځ وي یا د خلکو ترمنځ ـ باید وپېژندل شي. یوازې په دې توګه کولای شو د بهرنیو دښمنانو له دسیسو یا د کورنیو ناپوهانو له کړنو ځانونه وژغورو.”
په همدې حال کې د طالبانو د بهرنیو چارو وزیر امیرخان متقي وویل چې د تېرو سلو کلونو په اوږدو کې د افغانستان خپلواکي په ښه ډول نه ده ساتل شوې، او زیاته یې کړه چې نه شاه امانالله خان د انګلیس له استعماره د خپلواکۍ تر ترلاسه کولو وروسته او نه هم د شوروي د وتلو پر مهال د مجاهدینو مشران وتوانېدل یووالی وساتي.
هغه د سیمې هیوادونو ته په اشارې وویل چې د افغانستان د کمزوري کولو لپاره غونډې جوړې نه کړي.
د طالبانو د استخباراتو مشر عبدالحق وثیق هم په غونډه کې وینا وکړه او ویې ویل چې د طالبانو د حکومت پر وړاندې هېڅ جدي مخالفت نه شته. هغه د داعش سیمهییزه څانګه “پر افغانانو تپل شوی بهیر” وباله چې په افغانستان کې ځای نه لري.
خلک هم نور جنګ نه غواړي مګر تاسو هم سم انسانان شئ او خلکو ته د انسان په سترګه وګورئ. نجونو ته د تعلیم دروازې خلاصې کړئ، ځوانانو او عام ولس ته د کار ضمینه مساعده کړئ. د ګاونډیو په ځای خپل هیواد کې سرمایه ګذاري وکړئ. خلک چې په ګیډه ماړه وي نور خیر خیریت دی.